بمناسبة ثورة 30 يونيه أكتب في حب مصر
بعتب عليكِ يا مصر عشان بحبك
........
والله يا مصر بحبك
وأنتِ محيراني
طول عمري بنادي عليكِ
وأنتِ مش سمعاني
بحبك يا أم الدنيا
وأنتِ مخلياني
تايه وتعبان
ودموعي منك
مصحباني
ومش سيباني
والله ما عايز منك يـ أمي
حاجه شخصية
عايزك بس تعطفي وتحني
على الغلابة شويه
وخيرك يعود ويرجع
ذي ما قال ناصر
في بداية الجمهورية
وقالها كمان السيسي
لما تولى المسئولية
قالها بحب للناس الغلابة ديه
قالها بكل رقة وعطف وحنيه
.....
أبدأ يا أم الدنيا كلامي
برسالة من فقير بعتهالك
وهو بيبكي ويصرخ يقولك
تعبت بأعلى صوت
وهو محتار مش عارف
يعيش أزاي
باعت رسالة يقولك فيها
يا أم الدنيا تصدقي
أحبابك غلوا عليا
النور والميه
غلوا عليا حتى
العدس والفول والطعمية
غلوا البطاطس
والطماطم والباذنجان
حتى الفاصوليا والملوخية
فيه إيه فاضل بقه
للفقير يا أم الدنيا
وهو مش قادر يشتري حتى
شوية عدس و فول وطعميه
مها كان بيشتغل
وبياخذ يوميه
حتى رغيفك يا هنيه
مبقتش شيفاه
أنه عيش حتى عنية
عمال بيصغر
كل يوم شويه بـ شويه
غير الحشو اللي فيه
من مسامير وعيدان كبريت
وطفي سجاير
وتراب على رده من الأرضية
مبقاش فيه ضمير لكثير
من ناسك يا عنية
مبقاش فيه حتى نظرة لينا أحنا الفقراء
بحب أو أنسانية
ده رغيف يا أمي من قلتها
كان بيتاكل حاف بشوية مايه مغليه
برجل فرخه أو جناح من عند الفرارجية
....
يا أمي يا غالية
دي رسالة من ولأدك
بيقولولك فيها
تعبنا يا أمي .. يا أم الدنيا
دول خلاص
غلوا كل حاجة عليا
واللحمة خلاص بقى
بينها وبنا أتفاقية
ولادك الفقراء مبيشفوهاش
إلا في عيد الأضحية
لما تيجي مجانية
......
هو ده حال ولأدك
يا أمي يا أم الدنيا يا غالية
.....
وأنا من هنا بقول هالكِ
طول عمري يا أم الدنيا
حقولها جمايلك مهما عملتي مغرقاني
و مع أني عايش فيكِ وبرضه محيراني
مهما بعدت عنك من زعلي
أنتِ في قلبي وعمري ما بنساكي
ده زعلي أنك أنتِ اللي نسياني
فكره بس اللي قاعدين
ومريحين على الكراسي
يعبوا في قروشهم وينهبوا فيكِ
راح يعمل ايه بس الرئيس السيسي
عمل رقابة إدارية ومباحث أموال
ومتغيرات كثيرة بيعملها كل شويه
عشان يمسك شوية الحراميه
هما زرعه اتزرعت في أراضكِ من أعداءك
من غير بزور بتطلع وتعشعش فيكِ
دول هبيشه .. ودول نبيشه
ودول بشوات رجعوا تاني
ينهبوا فيكِ
رجعوا من تاني عشان يبنوا قصور
على أراضيكِ
.....
يا أمي يا غالية ولأدك اللي بيحبوكِ بيقولولك
بشواتك اللي كانوا زمان ما بعدوش كثير
رجعوا تاني عايزين ينهبوا خيرك
رجعوا تاني عايزين يسرقوا ليلك
دول حتى عايزين يقتلوا الحب
اللي مزروع بيني وبينك
عايزين يقتلوا حتى أحلامنا
اللي بداناها بعد 30 يونيه
مع ثورة كان قائدها السيسي
ب، بيان قال زعيمنا
تعودي يا مصر لأولادك
تعودي يا مصر بكل ميادينك
ولا ربعه ولا نهضة
خلاص ميدان واحد يجمعنا
وكان هو تحريرك
ومن التحرير فرحنا لك
وبـكل ميدان كان خروج لأولادك
بـ أفراح بتدعيلك يارب أنصرها وأحميها
وعلى أنغام الوطنيه
من السويس وبورسعيد والأسماعيليه
كانت مدنك يـا قناة تعزف لحن الانتصار
على أنغام السمسميه
.....
والله يـ أمي من حبنا وعشمنا فيكِ كتب نالك
وبرسالة مع الشاعر خالد بقول هالك
علشان بحبك يامصر بعتب عليكِ
وأنا مها قلت أو زعلت
قربت أو بعدت
بـ الأقيكِ يا أمي يا مصر
ساكنة في قلبي
ودايماً وحشاني
ده نيلكِ دمي اللي
بيجري في عروقي
ودي شمسكِ اللي
في لوني القمحي
ونورها دايماً في عيوني
وده جيشكِ
اللي بنام مرتاح وأنا مطمن
وهو بيحرس حدودكِ
ودي شرطة مصر بلادي
هما دول ولاد وطني
اللي ضحوا بـ أروحهم عشانك
واستشهدوا
على أيد إرهابي أو خاين
استشهدوا
وهما بـ يهتفو بأسمك
....
وفي النهاية
بس هنقول أيه
مهما بعادنا أنا وغيري بنحبها
وهنحب مين ادها
و هنلاقي فين زيها
والدفئ اللي في حضنها
دي حبيبتنا الغالية مصر
دايماً عاليه بعزها
دي نن عينينا أمنا
والله طول عمرنا بنحبها
واللي لازم عشانها
نكون وراء الرئيس السيسي
الدورة الجايه والدورات كلها
عشان تكمل مشاريعك
ونشوفك 2030 أم الدنيا
أد الدنيا لما تبقى
جمهورية جديدة ثانية منها
و معاها ننزل نشارك
وننتخب مجلسها النيابي
ونجيب اللي زينا
بيحبها وبيحب أرضها
لآن مهما حصل منها
ده مش ذنبها
ده ذنب اللي بيخونها
ومش بيحبها
لكن أحنا بندوب في عشقها
وهنكون فداها
وفداء رمالها ونيلها وأرضها
هو ده مجدها هو ده عزها
.....
بحبك يا مصر
تحيا مصر .. تحيا مصر .. تحيا مصر
الشاعر خالد أحمد
الشهير بـ خالد العطار
ملتقى الشعراء والمبدعين العرب
رابط النص بالحساب على الفيسبوك
https://www.facebook.com/khaled.attar.39/posts/5081015385315469
