خلود .. فرحة عمري

 

 

خلود .. فرحة عمري

.............

بنتي حبيبتي خلود الغالية

كبرت ولله وجالها عريس

أتمناها تكون في حياته

أتمناها تكون له ونيس

والله يا لوده كبرتي ياحلوه

بعد مخلصتي التدريس

.....

خلود ياحياتي

سنين عمركِ عشتيها في قلبي

أحابي عليكِ وأنتِ صغنونه.. حلوة وأمورة

تزحفي وتتسندي على الحيطة قدام عيني

وكانت فرحة قلبي تكون بزياده

لما بتمشي وتركبي فوق كتفي

متشعلقه مش عايزة تسبيني 

تعرفي يا لوده أنتِ لماما وبابا أجمل فرحه

عشنا فيها معاكِ يا لوده وسنين العمر أهي بتعدي

أدام عيني كبرتي يا نونه وحده وحده دخلتي الروضه

وبعد الروضه دخلتي المدرسة .. أبتدائي وبعدها أعدادي وثانوي

وسعتها قلنا كبرتي يا لوده وخلاص بقه تلبسي على شعرك طرحه

شفتِ ياقلبي يا أجمل فرحه سنين العمر وياكِ بتجري

وعدت الأيام وكبرتي يا لوده وكمان دخلتي أهو الجامعه

وبعد الجامعه جانا حسام  ياحبيبتي يطلب أيدكِ مني

ولما سألتكِ رأيك ايه قلتِ اللي تشوفه يا بابا ودي معناها الموافقه

قلت يا لودة حـ تتغربي وتروحي محافظة بعيدة وتبعدي عني

قلتِ نصيبي يا بابا أنتوا في قلبي ودي مش غربه

عدتهالك وقلت يا لوده قدمنا الوقت بنسأل فيها عن عريسك فكري تاني

.........

وكان الرد من حبايبنا في قبلي . عيله أصيله ليها عروق وجذور وتاريخ له جمال السمعه

هااااااااااااااا يا لوده سألنا خلاص وأطمن قلبي عليكِ وكان الرد بالموافقه

وبيني وبينك تقوللي حسام طيب وأبن حلال وبيعرف ربه وحـ يسعدني

قلنا خلاص على بركة الله نحدد يوم نفرح بيكم بعقد قران ونكتب فيه

عقلي أخذني للتفكير لوده كبرت وحـ تتجوز ومهما بعدت هي في قلبي

خلاص ده نصيبها إللي كتبه ربي عليها تعيشه معاه

وكان قرانها يوم الجمعه 19 أغسطس 2022 م من الشهر الماضي

خلاص يا لوده بقيتي عروسه أهو مفيش ثانيه

وكمان حددنا يوم زفافكِ يوم الأربعاء  7 من شهر سبتمبر الحالي

حبيبتي خلود بقت عروسه أهي في الزفه

...........

مسكه بـ أيدها حسام عريسها

 آآآآآآآآآآهـ  ياخلود آآآآآآآآآهـ  ياحبيبتي

أنا مش مصدق نفسي أزاي أرجع بيتي أنا من غيرها

ومن غير ما أشعر في ثواني كان الدمع مغرق عيني

مش بس دموعي لفراقها لا ده من كتر الفرحه لفرحتها

 أخذني سامح جوز أخت حسام وأنا بمسح دمعي قدامها

ويقوللي الزفه من غيرك مش هتكمل  أدخل فيها

ودخلت الزفه وشفت خلود بفستان أبيض وتاج وطرحه مسكاها بأيدها

أخذت حسام بالحضن ثواني وكأني بعاتبه أخذت خلود يا حسام مني لما كبرت وأنا أهو بقيت من غيرها

بصت خلود وفي عينها الدمعه وكأنها بتقوللي يا بابا تعالى خذني في حضنك يلله بفرحه وتممها

أخذت خلود في حضني دقائق وكأني بودعها ومش عايز أسيبها إلا في بيتها

أتصورنا ووقفت شويه أتمالك نفسي وأنا بتفرج على زفتها

زفه جميله طبل ومزمار بلدي زفه صعيدي يا جمالها ويا حلوتها

دخلت لوده وحسام القاعه وكل حبايبنا صقفه وحده على دخلتها

 قعدت لوده على كرسيها جوه الكوشه وحسام يرقص على فرحتها

أخذني أسامه جوز أخت حسام تعالى معايا أنت وماما نتصور مع عروستنا دي ليليلتكم وليليلتها

وأتصورنا صور كثيره  أنا وحسام وخلود صور جميله مع مامتها

وكانت ليله من أجمل ليله عشت أنا فيها بزفافها الليله ودعيت ليها ربي أسعدها وأسعد  أيامها وحياتها

وكمل يارب الفرحه ليها وأرزقها الزريه الصالحه بنين وبنات  يسعدوها ويعمروا بيتها

وتمت الليلة بفقرات جميله منها أغاني شبابي وشعبي ومهرجانات وأغاني قبلي أول مره أنا بسمعها

وكانت الزفه وأحنا معاها بنودعها بدموع عيني أنا وأخوتها ويا مامتها

خلاص ياخلود بداية جديده وحياة سعيدة أن شاء الله  أنا أهو ياحبيبتي أنا بكتبها

...........

كلمات من داخل قلبي إهداء لحبيبة بابا خلود

خالد العطار

كل سنه وأنتِ طيبه يا خلود اليوم 17 / 9 عيد ميلادك عقبال 100 سنه يا حبيبة بابا

ملكيه فكريه مسجله
حقوق النشر محفوظه
برقم 4535 / 17 / 09 / 2022 م
الرابط على الفيسبوك
https://bit.ly/3BmgxG9
الرابط على اليوتيوب